Cysylltiadau cymunedol a’r cynnydd mewn digwyddiadau hiliol yn dilyn Refferendwm yr UE
Yma yn Tai Pawb rydym yn credu’n gryf bod ein haelodau yng Nghymru’n arwain y ffordd yn eu hymrwymiad i gydraddoldeb, amrywiaeth a chyfiawnder cymdeithasol. Mae gan fudiadau tai cymdeithasol hanes hir o groesawu pobl, ac o gefnogi a dathlu amrywiaeth eu tenantiaid.
Yn anffodus, mae naws y ddadl ar refferendwm yr UE wedi gwneud i lawer o gymunedau mewnfudwyr a lleiafrifoedd ethnig deimlo’n anghyfforddus ac mae wedi arwain at gynnydd mewn achosion o gam-drin hiliol. Yn ystod y misoedd diwethaf rwyf wedi gwerthfawrogi’n fawr y negeseuon niferus a diffuant o groeso a’r cymorth a gefais gan gydweithwyr, ffrindiau, teulu a chymdogion, ac rwyf yn siŵr bod y cymunedau rydych yn gweithio â hwy’n teimlo’r un fath.
Gwyddom fod y rhan fwyaf o ddigwyddiadau casineb yng Nghymru’n digwydd yn agos at gartrefi pobl ac nad yw’r rhan fwyaf ohonynt (tua 70 y cant) yn cael eu hysbysu i’r awdurdodau. Rwyf yn siŵr y byddwch yn ystod yr amser anodd hwn yn gwneud popeth o fewn eich gallu i roi tawelwch meddwl i denantiaid a chymunedau o gymunedau lleiafrifoedd ethnig a mewnfudwyr ac yn gwneud iddynt sylweddoli bod croeso iddynt yma ac y byddant yn cael pob help os byddant yn profi unrhyw gamdriniaeth hiliol, aflonyddwch neu fygythiadau. Mae hyn yr un mor bwysig mewn ardaloedd â lefelau uchel ac isel o amrywiaeth lle gall cymunedau deimlo’n fwy ynysig.
Roeddwn mor falch o weld datganiadau gan ein haelodau sy’n cadarnhau hynny: Cymdeithas Tai Taf, Cymdeithas Tai Cadwyn, Cymdeithas Tai Cymuned Caerdydd (CCHA), Grŵp Cartrefu Cymunedol Cynon Taf a llawer mwy. Yn fy marn i mae’r digwyddiadau hiliol hyn yn cael eu hachosi gan leiafrif bychan o bobl sy’n credu bod canlyniadau’r bleidlais yn cyfiawnhau eu hymddygiad, ond mae gennym ni i gyd, staff a thenantiaid, ran i’w chwarae i herio hyn.
Wrth edrych ar gyd-destun canlyniadau refferendwm yr UE a phwysigrwydd ymgysylltu â chymunedau ar draws rhaniadau hil, cenedligrwydd, oedran a dosbarth cymdeithasol, rwy’n credu ei bod yn hynod bwysig hefyd ein bod yn meddwl am rôl landlordiaid cymdeithasol a phartneriaid i godi pontydd ar draws y rhaniadau hyn yn y tymor hir er mwyn gwella cysylltiadau cymunedol. Roedd y prif weinidog yn llygad ei le pan ddywedodd, “mae angen inni ddod o hyd i ffordd o siarad â’n gilydd unwaith eto – efallai ein bod wedi pleidleisio mewn ffordd wahanol, ond rydym yn parhau i fod yn gymdogion, ffrindiau a theulu.”
Ym mis Awst, buom yn cynnal seminar ar thema Mewnfudwyr, Ffoaduriaid a Chysylltiadau Cymunedol, i drafod y pwnc pwysig hwn ag aelodau, i rannu arferion gorau ac i ystyried y camau nesaf.
Os bydd angen rhagor o help arnoch i ddelio ag achosion o ddigwyddiadau casineb, gallwch ddefnyddio pecyn cymorth troseddau casineb Tai Pawb a Llywodraeth Cymru, sy’n cynnwys arferion da a rhestrau gwirio i adolygu eich arferion gweithio a’ch polisïau. Mae gennym hefyd gwrs hyfforddi troseddau casineb, ac efallai yr hoffech fanteisio arno.
Gadewch i ni i gyd gydnabod y cryfder sy’n dod yn sgil ein hamrywiaeth a’r rôl mae’n ei chwarae i wneud Cymru’n lle gwell i fyw.
Alicja Zalesinska